608/10: ¡¡MI EXTREMAÚRA...!!

¡¡Mi Extremaura…!! (608)

(Ensayo dialectal)

Jace y’algunos días / m`han subío a la sierra,
-la sierra del Arquillu-, / pa que de nuevu viera
mis paisajes d’entoncis, / cuandu entre mis cormenas
me pasaba la vía, / cuidiándolas de cerca,
sin dejar escaparsi / ni un enjambri siquiera.

Cuandu la miel cogía / en su oportuna fecha,
dejaba la precisa / pa que no se murieran,
al llegar el inviernu /y acabar la cosecha
de flores y de frutus, / que empezó en primavera.

Hay una regla d’ oru / que ice que quien quiera
tenel cormenas juertis, / no debe abusal d’ ellas,
y al castralas, dejaldis / bien colmá la dispensa
para qu’ en el inviernu, / cuando no hay nada juera
que llevarsi a la boca, / de jambri no si mueran
y el nigocio s’estrumpi / y se marchi a la mierda.

He güertu a las alturas / serranas y suberbias
qu’ ha tiempo no jollaba; / he güertu a mis cormenas
y a divisal, lejanu, / al Tajo, que serpea
cruzandu la llanura / allá por Alconetar,
cual un jilo de plata / donde el sol se refleja
y relumbria, avisando / de su cursu y presencia.

Todu era lo mesmu; / tan sólu no lo era
el joven cormeneru / de los añus cincuenta,
hoy día convertíu / -aunque él no lo quiera-,
en venerable ancianu / que vacila y cojea,
y al que hay que ayudale / a subir a la sierra,
la mesma qu’él subía / corriendu, con sus pielnas,
cuandu iba diligente / a cuidiar sus cormenas.

Tenía veinte añus, / ajora, más d’ochenta;
estaba sanu entoncis; / ajora, hechu una pepla;
pero sigue pensandu, / y lo hará hasta que muera,
que comu Extremaura / nada hay en la tierra
que sea tan hermosu, / de tan grata vivencia,
lo mesmu en las llanuras, / a veces meio secas,
donde Tajo y Guadiana / se remansan y juegan,
qu’en las cumbres altivas / que curonan sus sierras,
allá por Tornavacas, caminu de Castiella.

He precisau ayúa / pa superá las cuestas,
mas he güerto de nuevu / a divisal las jesas
de mi campu extremeñu, / a lo lejus dispersas,
mostrándome su encantu, / derrochandu belleza,
igual que sucedía / cuand’ iba a mis cormenas,
a ganarmi el sustentu / con su miel y su cera.

¡Qué hermosa, Extremaura; / que bonita es mi tierra!
¡No sé lo que jaría / para golver a ella…!


José María Hercilla Trilla
Salamanca, 2 Mayo 2010